A Confederación Hidrográfica do Miño-Sil (CHMS), amplía a súa rede de control hidrolóxico coa instalación dunha nova estación do Sistema Automático de Información Hidrolóxica (SAIH) no río Tremor, á altura do concello de Torre del Bierzo. A actuación forma parte do proxecto europeo Risc_Plus, destinado a mellorar a prevención e resposta fronte a fenómenos hidrolóxicos extremos.
Durante os meses de verán, executáronse os traballos necesarios para habilitar este novo punto de control, que incorpora instrumentación de última xeración para medir o nivel do río, a pluviosidade e a temperatura ambiente. Estes datos son rexistrados de forma continua e son enviados cada cinco minutos ao Centro de Control de Conca (Cecu) da CHMS, en Ourense, permitindo dispor de información actualizada e precisa ante posibles episodios de avinguda ou escaseza de auga.
Cunha inversión aproximada de 41.300 euros, esta actuación permite ampliar e reforzar a rede de control hidrolóxico da demarcación, modernizando a capacidade de seguimento das condicións hidrometeorolóxicas nun dos afluentes do río Sil.
A instalación destes sistemas avanzados de medición permite mellorar significativamente o coñecemento do estado dos recursos hídricos e a resposta dos leitos ante episodios de choiva intensa, avingudas ou períodos prolongados de seca.
O acceso a datos precisos e en tempo real a través da Rede SAIH facilita ás autoridades competentes anticiparse aos efectos de episodios extremos mediante accións de prevención, preparación e protección, contribuíndo así á seguridade da poboación e á conservación do medio ambiente.
Con esta nova infraestrutura, a CHMS continúa avanzando no fortalecemento dos sistemas de alerta temperá e na xestión sostible da auga na demarcación Miño-Sil, en consonancia cos obxectivos do proxecto Risc_Plus.
“O proxecto Risc_Plus, cofinanciado polo programa europeo Interreg España–Portugal (Poctep) 2021–2027, aposta por solucións baseadas no coñecemento científico, a cooperación transfronteiriza e a innovación tecnolóxica, para garantir unha xestión eficiente e sostible da auga nun escenario marcado polo cambio climático” concluíu José Antonio Quiroga, presidente da Confederación.+
