• O obxectivo é controlar as crecidas e preservar as persoas e bens de Lobios.

O río Lobios, ao seu paso pola capitalidade do seu mesmo nome, contará cun sistema de control e monitorización en tempo real da situación hidrográfica do cauce fluvial. Técnicos da Confederación Hidrográfica do Miño-Sil supervisaban onte a nova instalación, denominada sistema automático de información hidrolóxica (SAIH), o quinto que se instala na comarca tras os dispositivos que controlan o caudal no Limia en varios puntos desde Ponteliñares, no Salas e no río Caldo, en Bubaces (Lobios).

A través das estacións SAIH “obtéñese información dos nosos cauces, en tempo real, baseado na captura, transmisión e procesamento dos valores adoptados polas variables hidrometeorolóxicas e hidráulicas máis significativas” trasladaba o presidente da Confederación Hidrográfica do Miño-Sil, José Antonio Quiroga, que poñía o acento na importancia de conseguir datos precisos “que axuden na toma de decisións” e que permitan preservar as persoas e os bens.

A estación instalada nas inmediacións da praza Roja de Lobios contou cun orzamento de 46.250 euros dentro do proxecto europeo POCTEP RISC_PLUS para fortalecer a resiliencia das bacías transfronteirizas do Miño e Limia fronte ao cambio climático.

A actuación de Lobios, en fase de proba durante un mes, únese ás xa executadas nos ríos Narla en Friol (Lugo), Quiroga (Lugo) e Tamuxe (O Rosal, Pontevedra), e están avanzadas as obras no Sil en Toreno (León). Ao final deste proxecto, serán 124 os puntos de control en toda a Demarcación Miño-Sil. No caso do sistema de calidade das augas (SAICA) pasará de 18 a 20. As actuacións no territorio portugués, avanzaban desde a confederación, céntranse en labores administrativas para completar a rede de vixilancia no seu territorio co obxectivo de garantir un enfoque coordinado e transfronteirizo.

O proxecto, con 1,6 millóns para o período 2023-2026, incluirá a elaboración de plan especial de sequía conxunto.