O proxecto RISC_PLUS progresa máis que adecuadamente, polo menos no lado español. Onte tivo lugar en Ourense a 19ª reunión de socios da iniciativa da Eurorrexión para xestionar e l auga e previr inundacións ou secas nas concas internacionais do Miño e o Limia, na que se revisaron os avances alcanzados e concretáronse os próximos pasos a seguir para mellorar a resiliencia. O dato máis destacado o progreso na execución dos novos puntos de control da rede do Sistema Automático de Información Hidrolóxica (SAIH) e do Sistema Automático de Calidade das Augas (SAICA).
9 das 10 instalacións que se prevían executar na Confederación Hidrográfica do Miño-Sil xa están postas en marcha. Desta forma, xa está case completado o elenco de puntos de control, que comezou con instalacións en Friol (Lugo), Quiroga (Lugo) e O Rosal (Pontevedra), ás que seguiron as inauguradas en xullo de Toreno (León) e a local Lobios. Por outra banda, expuxéronse os avances na análise e predición dos fenómenos asociados ás secas e inundacións, así como no desenvolvemento dun enfoque metodolóxico para avaliar o seu impacto socioeconómico na Eurorrexión Galicia – Norte de Portugal.
Con todo, varios trámites administrativos están a alongar algúns dos prazos previstos, pois a pesar de que se expuña dar por pechado o proxecto este ano, durante o encontro abordáronse cuestións relativas á xestión do proxecto polas cales se acordou fixar como nova data de finalización do mesmo o 31 de decembro de 2026, co obxectivo de garantir o cumprimento de todos os fitos programados. Desde a Confederación Hidrográfica do Miño-Sil apuntan a que este atraso é debido aos permisos de Europa, que, como é habitual neste tipo de proxecto, non deu aprobación co tempo suficiente a algúns procedementos.
O lado portugués vive ademais un episodio de papelada individual. Ao contrario da aceleración española coa instalación dos SAIH e SAICA, alén do Miño as 7 estacións en execución estarán concluídas cara ao final deste ano 2025, é dicir, aínda non ten en pleno funcionamento ningunha das estacións que se lle asignaron. Fontes próximas ao proxecto sinalan diferenzas entre a burocracia de ambos os países como motivo, pero advirten de que nas zonas onde se executarán os puntos de control xa hai instalada sinalización.
Desde RISC_PLUS aseguran que o aumento de prazos non retardará en ningún caso o impacto real do proxecto na preservación, preparación e dixitalización información hidrometeorológica das concas fronteirizas. Sinalan ademais que o proxecto RISC_LM, do cal deriva o actual, conseguiu ante a Unión Europea o 100% de execución, cando este tipo de proxectos adoita quedarse entre o 80 e o 90%.
