A cidade de Ourense conta desde agora cunha nova ferramenta para vixiar o estado dos seus ríos e anticiparse a posibles emerxencias relacionadas coa auga. A Confederación Hidrográfica do Miño-Sil— CHMS—, o organismo público que se encarga de xestionar os ríos desta conca, instalou unha nova estación de medición no río Barbaña, que atravesa boa parte do centro urbano.

Este novo punto de control forma parte do chamado Sistema Automático de Información Hidrolóxica— SAIH—. Trátase dunha rede de estacións repartidas por todo o territorio que recollen datos en tempo real sobre o caudal dos ríos, a choiva caída ou o nivel da auga. Eses datos envíanse directamente ao Centro de Control de Cuenca, onde se reciben cada cinco minutos e analízanse para tomar decisións rápidas e ben fundamentadas.

Contar con información precisa e ao instante permite reaccionar con máis rapidez ante situacións perigosas, como desbordamentos por choivas intensas ou períodos de seca. Ademais, axuda a xestionar mellor o uso da auga, un recurso cada vez máis escaso e valioso, especialmente nun contexto de cambio climático.

A estación instalada no Barbaña contribuirá tamén a ter unha imaxe máis completa do que ocorre na rede fluvial de Ourense, sumándose a outros puntos de medición que xa existen na provincia e no resto da conca Miño-Sil.

Para todo iso o custo total da instalación foi de 48.381 euros. Desa cantidade, máis de 36.000 euros, en concreto, 36.285,75 euros, foron financiados con fondos europeos, grazas ao proxecto POCTEP RISC_PLUS, un programa de cooperación entre España e Portugal que ten como obxectivo mellorar a resposta ante riscos naturais, como as inundacións, mediante a innovación tecnolóxica e o traballo conxunto entre territorios veciños.

Este proxecto enmárcase no Programa Interreg VIN A España–Portugal (POCTEP) 2021-2027, cofinanciado polo Fondo Europeo de Desenvolvemento Rexional (FEDER), que apoia iniciativas que promovan a sustentabilidade e a colaboración transfronteiriza.