- Durante a xornada, deuse a coñecer o Centro de Control de Cunca (CECU), a rede SAIH-SAICA e o sistema MIDAS como ferramentas de monitorización avanzada
- Esta actividade enmárcase no proxecto europeo RISC_PLUS, que promove a prevención e resposta fronte a fenómenos hidrolóxicos adversos
A Confederación Hidrográfica do Miño-Sil (CHMS) e a Universidade de Vigo (UVigo) organizaron unha xornada técnica conxunta na que presentaron os sistemas de vixilancia e control hidrolóxico que ambas as institucións desenvolven para a prevención de inundacións e a xestión sustentable da auga na demarcación.
Carlos Guillermo Ruiz, Xefe da Oficina de Planificación Hidrolóxica da CHMS, expuxo o funcionamento do Centro de Control de Cunca (CECU) e das estacións do Sistema Automático de Información Hidrolóxica (SAIH), destacando o seu papel fundamental na protección da poboación e os beneficios que proporciona fronte a episodios de crecidas. Ademais, subliñou os beneficios económicos e técnicos que os proxectos europeos achegan para a modernización destas infraestruturas estratéxicas.
O CECU constitúe o epicentro do sistema de vixilancia da CHMS. Operativo de forma ininterrompida os 365 días do ano, este centro recibe vía satélite, en tempo real e cada cinco minutos, datos das 117 estacións (100 SAIH e 17 SAICA) distribuídas ao longo dos 17.600 km² da demarcación. Estas estacións rexistran variables hidrometeorolóxicas como precipitación, nivel e caudal dos ríos, estado de encoros e temperatura ambiente, entre outras.
Grazas a esta información, actualizada de forma continua e accesible publicamente a través da web do organismo, o CECU elabora predicións diarias de precipitacións e caudais que permiten anticiparse a posibles episodios de inundación. As alertas remítense inmediatamente ás Delegacións e Subdelegacións do Goberno, servizos de protección civil, servizos de emerxencia autonómicos (112) e concellos, facilitando a activación de plans de emerxencia con suficiente antelación.
Pola súa parte, Helena Barreiro, docente na Universidade de Vigo, presentou o sistema MIDAS, unha ferramenta complementaria desenvolvida desde o ámbito académico que reforza a capacidade de análise e xestión da información hidrolóxica na demarcación.
Esta xornada enmárcase no proxecto europeo RISC_PLUS, cofinanciado polo programa Interreg España-Portugal (POCTEP) 2021-2027, que ten como obxectivo mellorar a prevención e resposta fronte a fenómenos hidrolóxicos extremos mediante a cooperación transfronteiriza e a innovación tecnolóxica.
A colaboración entre a CHMS e a Universidade de Vigo, no marco deste proxecto, reforza a capacidade de análise e xestión da auga na demarcación, apostando por solucións baseadas no coñecemento científico e na modernización de infraestruturas para garantir unha xestión eficiente e sustentable nun escenario marcado polo cambio climático.
